दुःख गरे गाउँमै बसेर मनग्य आम्दानी

केपि किरण शर्मा / रवि भट्ट

पिठुवा / यहाँ हावामा पैसा उडिरहेको छ । मेहनत गरे मनग्य आम्दानी गर्न सकिन्छ हाम्रा दाजुभाइहरु देशमा बसेर केही गर्न सकिएन भन्दै महिनावारी पाँच, सातहजार कमाउन ज्यानको बाजी लगाएर सात समुद्र पारि अरबको मरुभूमिमा भेंडा चराउन जान्छन् । यहाँ मेहनत गर्दैनन् म त धिक्कार भन्छु तिनीहरुलाई । यी भनाइहरु हुन् पूर्वी चितवनको पिठुवा-१ हात्तीगाढे गाउँका मेहनती ४० वर्षिय हरि अधिकारीको ।

आजभन्दा २३ वर्षअघि नुवाकोटको तारुकाबाट चितवन बसाइ सरि आएका टिकाराम र दीपकुमारी अधिकारीका पाँच भाइ मध्ये काँहिला सन्तान हुन् हरि । चार सन्तानका बाबु निरक्षर हरिलाई छोरा, छोरीहरुलाई शिक्षा दिनको लागि आफ्नो खेतीले र घरको आम्दानीले अपुग हुँदै गएपछि घरपरिवारबाट विदेश जानुपर्छ भन्दै दबाब बढ्दै गयो तर उनको मन भने विदेश जानु हुँदैन आफ्नै गाउँघरमा बसेर केही गर्नुपर्छ भन्ने लागिरहेको थियो ।

त्यसैले सात वर्षअघि उनले आफ्नै गाउँमा बसेर मेहनत गरी परिवारलाई राम्रोसँग लालनपालन गर्छु भन्ने मान्यताका साथ ६ हजार खर्च गरेर रिक्सा किनेछन् ।

हरि भन्छन् - मेरो कमाइ खाने भाँडो यही रिक्सा हो भन्ने सम्झेर रिक्सा किनेकै दिन मैले त्यसलाई पूजा गरें र त्यसै दिन नारायणगढ बजार गएर केही फलफूल किनी रिक्सामा राखेर बाटोमा बेच्दै हिँडे ।

पहिलो दिनकै आम्दानीले मलाई यो व्यवसाय गर्न हौसला मिल्यो र त्यसपछि मेरो दैनिकी बन्यो बिहान सबेरै घरबाट रिक्सा लिएर निक्लनु नारायणगढ बजार जानु र मौसम अनुसारका फलफूल किनेर गाउँगाउँ चाहारेर बेच्दै हिँड्नु ।

सात वर्षको अन्तरालमा आफ्नो जीवन आर्थिकरुपले कायापलट भएको सुनाउँदै उनले फर्माए । मेरो झुप्रो घर थियो पोहोर साल मात्रै त्यसलाई भत्काएर चार कोठाको पक्की घर बनाएँ । छोराछोरीलाई कुनै पनि कुराको अभाव हुन नदिइ राम्रोसँग पढाएको छु ।

विदेश गएको भए यत्तिकै नहुन पनि सक्थ्यो । दुःख पाएर फर्केका पनि धेरै उदाहरण छन्, म त दिनभरि दुःख गरे पनि कम्तीमा पनि बिहान बेलुका परिवारसँग बस्न त पाएको छु । दैनिक कति कमाइ हुन्छ त भन्दा हरि हाँसेर भन्छन् - 'दैनिक भन्दा पनि सरदर महिनाको हिसाब गर्दा १५ देखि २० हजारसम्म कमाइ हुन्छ । कमाइ गर्न त्यति सजिलो छैन दुःख गर्नुपर्छ ।'

पुस माघको ठण्डी होस् या बैशाख जेठको चर्को घाम एकोहोरो रिक्सा ठेल्नैपर्छ । तै पनि सोचे अनुसार फाइदा भएपछि खासै दुःखको अनुभव हुँदैन । पिठुवाको हात्तीगाडेदेखि नारायणगढ करिब २० कि.मी. को बाटो रिक्साभरि मौसम अनुसारको फलफूल टन्नै राखेर ओहोर दोहोर गर्नु हरिको दैनिकी नै हो ।

घरगाउँमा नै बसेर मेहनती भई काम गरे मनग्य कमाइ गर्न सकिने उनको राय छ ।काम गर्न लाज मान्नु हुँदैन । कुनै पनि काम ठूलो/सानो हुँदैन, श्रमको सम्मान गर्नुपर्छ, फजुल खर्च गर्नु हुँदैन । यही बसेर पनि पैसा कमाउन सकिन्छ । विदेश जान मरिहत्तै नगरौं हरिको सुझाव छ ।

.

Posted on : May 25, 2010, 10:20 am

Source :

• First
• 2
• 3
• 4
• 5
• ...
• LAST