बेइमान को ???

शम्भुराज रेग्मी

नेपाली राजनीतिमा अहिले बेइमान भन्ने शब्दले निक्कै नै महत्व पाएको छ । समय अनुसार नै शब्दहरूको फेरबदल भइरहन्छ नेपाली राजनीतिमा । यस्ता शब्दहरू केहि समयका लागि चर्चित हुन्छन् । जसको लामो समयसम्मको आयु रहेको हुँदैन । जुन क्षणिक तर चर्चित हुन्छन् । नेपाली राजनीतिमा २०६७ जेठ १४ पनि आयो । आयो मात्रै हैन गयो पनि । तर जेठ १४ लाई नै पर्खेर बसेका नेपाली जनताहरू निरास भए । किनकी राजनीतिक दलले दिन्छौँ भनेको नयाँ संविधान भने नपाएर नै हो । तर पनि धैर्यताको बाँध भने अझै टुटेको छैन् नेपालीहरूको । अझै आशावादी छन् नेपालीहरू । नयाँ संविधान २०६८ जेठ १४ मा भने पक्कै पनि नयाँ संविधान पाइन्छ भनेर ।

अहिले नेपाली राजनीतिमा एकीकृत नेकपा माओवादी, नेपाली काङ्ग्रेस र नेकपा एमालेले खुब चर्चा कमाइरहेका छन् । यिनीहरूको सानोदेखि ठूलो काम नेपाली सन्चार क्षेत्रले प्राथमिकताका साथ समाचार सम्प्रेसण गरिरहेका छन् । २०६७ जेठ १४ मा नयाँ संविधान जारी नभएपछि यिनै तीन दलले बसेर एउटा सहमति गरे । त्यो सहमति भनेको नै संविधानसभाको म्याद १ वर्षको लागि थप्ने । म्याद त थपियो सहमति नै गरेर ।

तर अहिले म्याद थपे पनि तीन दल आन्तरिक किचलोमा नै अल्झिरहेका छन् । उनीहरूले संविधान बनाउन त के सरकार गिराउने कि टिकाउने भन्ने होडमा लागि रहेका छन् । जेठ १४ गते मध्यरातमा भएको सहमति १५ गते बिहान हुन नपाउँदै विभिन्न प्रकारका टिकाटिप्पणीका साथ नेपाली सन्चार क्षेत्रमा तरङ्गित हुन पुग्यो ।

तीन दलबीच भएको तीन बुँदे सहमतिको दोस्रो बुँदा त १ घन्टा बित्न नपाउँदै कार्यान्वयन भयो तर अरु दुइवटा बुँदा भने हप्तादिन वितिसक्दा समेत कार्यान्वयनको पक्षमा उन्मुख नै भएन् । यसलाई सबै दलले फरकफरक दृष्टिकोणले अघि सारे । फेरी सुरु भयो राजनीतिक किचङ्गल । फेरि शब्दवाण हान्न सुरु गरियो एकले अर्को पाटीलाई। यसै क्रममा बिहीबार एनेकपा माओवादी स्थायी समितिको बैठकले निर्णय गर्‍यो । नेपाली काङ्ग्रेस र नेकपा एमालेले माओवादीलाई धोका दियो भनेर । अर्थात् माओवादी स्थायी कमिटी बैठकले निर्णय गर्‍यो-"काङ्ग्रेस र एमालेले सहमतिको राजनीतिमा बेइमान गर्‍यो ।"

यसरी आविश्कार भयो नयाँ शब्दको र सुरु भयो नयाँ शब्द प्रयोगका लागि होडबाजी । सहमति गर्ने त भन्छन् तर हुन सकेको छैन दलहरूबीचको सहमति । नयाँ शब्दजाल प्रयोग गरी चर्चामा आउन चाहन्छन् । कसैले सापटी लिएर हुन्छ कि त कसैले न्वारननै गरेर हुन्छ विपरित दललाई कसरी कटाक्ष गर्ने भनेर उद्धत् नै देखिन्छन् ।

यसैमा नेपाली काङ्ग्रेस र नेकपा एमाले पनि के कम । उनीहरूले पनि शुक्रबारदेखि माओवादी नै बेइमानी भएको निष्कर्ष निकालेका छन् । शुक्रबार प्रधानमन्त्रीको सरकारी निवास बालुवाटारमा बसेको काङ्ग्रेस र एमालेका शिर्ष नेताहरूको बैठकले एनेकपा माओवादीले नै अहिलेको राजनीतिक बेइमानी गरेको ठहर गरेको छ । तर बबुरो नेपाली जनता कसलाई के थाहा बेइमानी को हो भनेर । तर पनि दलहरूको आरोप र प्रत्यारोपको चर्तिकला भने नेपाली जनताले मज्जैले अवलोकन गरिरहेका छन् । अति भयो भने बिस्फोट हुने पनि के बेर ? धैर्यताको बाध छउन्जेल सहने हो । तर अति भयो भने जनताको सामु जनताकै पसिनामा रजाइँ गरिरहेका दलका नेताहरूलाई तिरस्कार गरेभने थाहा पाउनेछन् दलका नेताहरूले ।

गज्जबको नाटक मन्चन गरिरहेका छन् दलका नेताहरूले । विभिन्न शब्दजालहरूको प्रयोग गरेर । तर माओवादीले काङ्ग्रेस र एमालेलाई बेइमान भने पनि अथवा काङ्ग्रेस र एमालेले माओवादीलाई बेइमान भने पनि जनताका नजरमा यि तिनै दल विश्वमा कहिँ नभएका बेइमान सावित हुने अवस्था आइसकेको छ । यस कारण दलका नेताहरूले आफ्नो बोली र आचरणमा तत्काल सुधार गरी सहमतिको राजनीति अघि बढाउने बेला आएको छ ।.

Posted on : June 5, 2010, 4:44 am

Source :

• First
• 2
• 3
• 4
• 5
• ...
• LAST