संविधान लेखनको नयाँ कार्यतालिका सार्वजनिक

२ श्रावण । संविधानसभाले यसै वर्षको चैत मसान्तभित्र संविधान निर्माण सम्पन्न गर्ने गरि संविधान लेखनको नयाँ कार्यतालिका सार्वजनिक गरेको छ ।


संविधानसभा भवन नयाँ बानेश्वरमा आइतवार बसेको संविधानसभाको १ सय २ औ बैठकले नयाँ कार्यतालिका पारित गरेको हो । बैठकमा सभाअध्यक्ष सुवासचन्द्र नेम्वाङले २९ महिनाको १३६ हप्ते कार्यतालिका प्रस्ताव गर्नुभएको थियो ।


प्रस्तावित कार्यतालिका सर्वसम्मतवाट पारित भएको छ । पारित कार्यतालिका अनुसार संविधानसभामा विचाराधीन बाँकी मस्यौदा असोज मसान्तभित्र पारित गरि संवैधानिक समितिमा पठाइने छ । जसअनुसार संवैधानिक समितिले कात्तिक १ देखि मसान्तभित्र नयाँ संविधानको एकीकृत मस्यौदा तयार गर्नेछ ।


यसैगरि विषयगत समितिलाई दिइएको विवादित विषय टुङ्गाउनका लागि प्रतिवेदन अध्ययन समितिलाई एक महिनाको समयावधि दिइएको छ । एक महिनामा पनि सहमति जुटन नसके संविधानसभावाट बहुमतिय आधारमा मस्यौदा पारित गर्ने व्यवस्था गरिएको छ । यसअघि आजै बसेको कार्यव्यवस्था परामर्श समितिको बैठकले कार्यतालिका पारित गरेको थियो ।


यसैबीच, संविधानसभाले यसअघि तोकिएको समयमा संविधान जारी हुन नसक्नुको कारण सहितको श्वेतपत्र सार्वजनिक गरेको छ । बैठकमा सभाध्यक्ष नेम्वाङले संविधानका आधारभूत सिद्धान्तमा सहमति नभएका कारण तोकिएको समयमा संविधान बन्न नसकेको बताउनुभयो ।


सेना समायोजन जस्ता शान्ति प्रकि्रयाका विभिन्न पक्ष संविधानसभामा प्रवेश भएका कारण संविधान निर्माण प्रकि्रया प्रभावित भएको उल्लेख गर्नुभयो । संविधानसभाको बैठक फेरि अनिश्चितकालका लागि स्थगित भएको छ ।

Posted on : July 18, 2010, 2:07 pm

Source :

• First
• 2
• 3
• 4
• 5
• ...
• LAST